Zima uz klinčić i muškatni oraščić

Iako su klinčić i muškatni oraščić dostupni tokom cijele godine, ipak se smatraju namirnicama za hladne dane. Osim u napicima, probajte ih i u jelima, jer im daju posebnu aromu.

KLINČIĆ: Ako zima "miriše" po nekom začinu, onda je to zasigurno klinčić. Kuvano vino bez klinčića umanjuje osjećaj pravog zimskog doživljaja.

Ima intenzivan, veoma aromatičan, sladak, žareći i pomalo gorkast okus. Klinčić se ne jede, već se obično vadi iz jela prije posluživanja. Odlično ide uz slatka jela, a najpoznatiji je kao dodatak kuvanom vinu i pri pripremi punča i ostalih toplih zimskih napitaka. Upotrebljava se i za kuvanje kompota, likera, jela od mliječnih prerađevina, za slatke i krem čorbe i jela od riže. Koristi se i za aromatizovanje konzerviranog voća, voćnih jela i božićnih kolača. Stavlja se i u mesna jela kao što su svinjsko pečenje, divljač, te u tamne čorbe (gulaš) i neke vrste kobasica, crveni kupus, pečenu šunku...

LJEKOVITOST: Ima i ljekovita svojstva, ublažava disajne i probavne tegobe, pomaže kod zubobolje, štiti od upala. Koristi se za ubrzavanje zacjeljivanja rana, liječenje posjekotina, akni, gljivičnih upala i slično. Komponente iz klinčića stimulišu rad mozga, uklanjaju mentalnu iscrpljenost i umor, pomažu kod gubitka memorije, depresije i nervoze. Koristan je i dijabetičarima, jer pomaže u regulisanju nivoa šećera u krvi. Klinčić podstiče imunološki sistem, zahvaljujući antivirusnim svojstvima pomaže u razvoju otpornosti organizma. Osobe s osjetljivom kožom treba oprezno da ga primjenjuju.

MUŠKATNI ORAŠČIĆ: Muškatni oraščić je dodatak širokoj paleti slatkih i slanih jela zbog specifične arome. Orašastog je okusa, sladak, grije i ima lagani gorkasti ton. Neizostavan je u azijskoj kuhinji, a najčešće se dodaje u teška zimska jela, ali i u čorbe, jela sa povrćem, marinade, a daje poseban okus i jelima od bundeve. Takođe se stavlja u punč, kuvano vino, kompote, vruće večernje napitke, koljivo, kolače i slično.

LJEKOVITOST: Plod sadrži veliku količinu eteričnih ulja, pa se u medicini svrstava u narkotike. U vrlo malim dozama oraščić pomaže protiv želučanih i crijevnih tegoba, tako što olakšava varenje, djeluje protiv dijareje i mučnine, a ima i antidepresivno dejstvo. Služi za liječenje srca, liječenje groznice i slabe cirkulacije, te je uz to i poznati afrodizijak koji će zagrijati zimske dane. Preventivno djeluje na sprečavanje akumulacije holesterola. Preporučuje se za poboljšanje apetite, za liječenje reumatizma, eliminaciju umora i iznemoglosti.

M.Z.